Xogos Miudiño para unha tarde de enredos na Casa das Máquinas

miudino_foto2.jpg

O ciclo Xogamos na Casa! volve esta fin de semana á Casa das Máquinas da man de Xogos Miudiño. O sábado 19 de outubro, das 17 ás 19 horas, a rapazada de 1 a 12 anos poderá redescubrir brinquedos clásicos como os zancos, os aros, a ferradura, ou o tiracroios alén de trebellos para a exploración musical e outros pequenos xoguetiños especialmente pensados para o público miúdo. A diversidade dos materiais que se empregan neste espazo de diversión permite brincar, experimentar e pór a proba habilidades de puntería, equilibrio, velocidade ou estratexia con diferentes xogos e xoguetes que van mudando para poder explorar novas posibilidades de enredo.
Xogamos na Casa! continuará até final de ano con outras catro sesións. Ao seu abeiro, Garabato de Xogos tomará o edificio de Galeras en dúas ocasións: o 9 de novembro (ás 17 horas) e o 27 de decembro (ás 11 horas), cun regueiro de trebellos para aguilloar a habilidade, a destreza, a coordinación e o enxeño da rapazada. Todos eles construídos grazas á reciclaxe de trastes que alguén considerou vellos pero que, no fondo, tiñan aínda moitas cousas que achegar. Xogos Miudiño repetirá o 24 de novembro ás 11 horas, e os Xogos do Paporrubio, farano o 26 de decembro ás 17 horas cun compendio de brinquedos autónomos e animados de temática agraria para dar a coñecer un dos paxaros máis pequenos, rebuldeiros e cantaruxeiros da nosa fauna e facer accesible, a través da diversión en familia, unha cultura agraria que de por si adoita fascinar e marabillar.  
Todas as sesión do Xogamos na Casa! forman parte do ciclo En Familia de Compostela Cultura e son de balde até completar capacidade e sen necesidade de reserva.