Estudo Momento presenta ‘1888. Señorita Xulia’ no Teatro Principal

O Teatro Principal acollerá este venres ás 20.30 horas a representación de ‘1888. Señorita Xulia’, unha ollada actual ao polémico texto que August Strindberg escribiu no século XIX arredor do romance ilícito entre unha moza de clase alta e un dos seus criados. A emancipación da muller e a loita de clases atravesan esta proposta escénica da compañía teatral Estudo Momento que chega á cidade no marco do Foco ‘A Voltas cos Clásicos’ de Compostela Cultura. 

Iria Ares e Xoán Carlos Mejuto dirixen e interpretan esta nova montaxe con fonda pegada cinematográfica que, a partir da misteriosa morte dunha das personaxes, constrúe unha historia de suspense e formula para público un xogo arredor da verdade. A dicir da compañía, “o intento artístico é a desarticulación do concepto mesmo de verdade. Xulgar uns feitos sérvenos única e exclusivamente para pechar unha historia que restableza o equilibrio. Pero algunhas historias non poden pecharse nunca e é daquela cando a existencia se fai, para moitos, insoportable”.
Cara a ese fin, a posta en escena sitúa os protagonistas nun limbo atemporal e confínaos a unha gaiola aberta da que ambos tentan escapar sen sorte, unha metáfora visual das convencións sociais que os atrapan.

Desenvolvida en coprodución do Concello de Arteixo, a peza forma parte das propostas inscritas na Rede Galega de Teatros e Auditorios. As entradas para o espectáculo, a un prezo de 12 euros con descontos para os colectivos habituais, poden ser adquiridas na páxina web de Compostela Cultura, no despacho de billetes da Zona C (aberto de martes a sábado, de 11 a 14 e de 16 a 19 horas) e no do propio Teatro Principal (o día da función dende unha hora antes do seu inicio). Ao remate do pase, Iria Ares e Xoán Carlos Mejuto participarán na posfunción, un coloquio aberto co público da peza.