'Ritos de resistencia': O Grupo Ouriol pon son á poesía de Luísa Villalta

‘Ritos de resistencia’  é o título dun poema no que Luísa Villalta reflexiona arredor do papel da poesía como rebeldía e contestación ante canto nos adormece e anestesia, como mecanismo de supervivencia: “Isto é poesía, un ruído provocado. (...) Fronte á rutina, o rito da palabra tensa a pel do mundo: un tambor que desperta. A pel estremece-se porque recoñece a morte que baila fóra da tumba. Isto é tamén unha muller que resiste”. Ese título é, á súa vez, o do recital que Compostela Cultura programa o sábado 18 de maio en homenaxe á escritora, violinista e docente á que este ano se dedica o Día das Letras Galegas. A partir das 20.30 horas, as táboas do Teatro Principal servirán de escenario para un espectáculo multidisplinar da man do Grupo Ouriol no que a tamén poeta Eva Veiga porá voz aos versos de Villalta arroupada polas músicas de Bernardo Martínez e Fito Ares e as imaxes proxectadas polo pintor Alfonso Costa. A través desta conxunción artística, o recital explora as suxestivas sonoridades dos instrumentos (percusión, frauta, saxo soprano e xoguetes musicais) orquestrados coa palabra e o silencio e procura ofrecer mergullar o público nunha experiencia estética integral arredor da obra da autora coruñesa. 

ouriol.png

^{Integrantes do Grupo Ouriol}

A asistencia ao espectáculo é gratuíta previa retirada de convites (máximos 2 por persoa) dispoñibles a partir deste venres, día 3 de maio, na web de Compostela Cultura, no despacho de billetes da Zona C (aberto de martes a sábado, de 11 a 14 horas e de 16 a 19 horas) e no do Teatro Principal (o día do recital dende as 19.30 horas).