DE LUGARES E ÓRGANOS 2025

DATOS BÁSICOS

DE LUGARES E ÓRGANOS · MÚSICA E OUTRAS PAISAXES DE COMPOSTELA

Do 13 ao 20 de abril

O ciclo De Lugares e Órganos chega á súa décima edición. Os órganos de Compostela brillarán de novo coa chegada da primavera, nesta singular proposta que xa é un referente dentro da oferta cultural da cidade.

Un ano máis, porá son ao rico legado histórico atesourado durante séculos na nosa cidade, contando para iso co mellor do noso talento artístico, unido a intérpretes de diferentes procedencias, que ofrecerán un variado e coidado programa de músicas especificamente pensadas para seren interpretadas nos órganos composteláns.

Percorreremos ademais a cidade, na procura da pegada que o oficio da organaría deixou en Compostela e gozaremos de espazos de música ao vivo, conversa e cinema. Os órganos das igrexas da Universidade, San Paio, Santa Clara e, por vez primeira, un instrumento inédito nas programacións musicais compostelás, o órgano do convento do Carme, serán os protagonistas dunha nova edición deste xa veterano ciclo.

>>> Acceso a todos os eventos do ciclo

 

Acceso: 

De balde, previa retirada de convites (máximo 2 por persoa) a partir do mércores, 2 de abril 

  • Despacho de billetes da Zona C. Punto de Información Cultural. De martes a sábado, de 11 a 14 e de 16 a 19 h. Tel.: 981 542 462
  • De non se esgotaren, tamén se poderán recoller o propio día da actividade no lugar onde esta se celebre desde unha hora antes do seu comezo. As invitacións serán válidas ata 10 minutos antes do inicio da actividade. A partir dese momento, a organización resérvase o dereito a empregar as localidades non ocupadas.
  • A apertura de portas terá lugar aproximadamente media hora antes da hora de comezo dos concertos e actividades.

A asistencia á proxección na NUMAX ten un custo de 4€. Pódense mercar entradas anticipadas no despacho de billetes do cinema ou na web numax.org.

Info práctica: 
Domingo, 13 Abril, 2025 a Domingo, 20 Abril, 2025
Varios lugares