10ª EDICIÓN DO CICLO DE LUGARES E ÓRGANOS. MÚSICA E OUTRAS PAISAXES DE COMPOSTELA
ITINERARIO · MEMORIA SILENTE: A TERCEIRA ORDE, LUGAR DE MEMORIA DA ORGANARÍA GALEGA
OUTRAS PAISAXES, OUTROS TONS DA CIDADE
O percorrido levaranos, na mañá do xoves, do camposanto da Confraría do Rosario até a Terceira Orde, onde foron soterradas grandes figuras da organaría galega. Nun dos momentos de máximo esplendor da organaría ibérica, a comezos do século XVIII, instálase en Compostela Eugenio González de Cáceres, un organeiro que dará inicio a unha importante e longa saga familiar. Pai, fillos e neto serán organeiros na Catedral ao longo dun século e, ademais, realizarán encargas por toda Galicia. Situados na elite da pequena burguesía da cidade, serán membros da Terceira Orde e, en calidade de tales, tres deles serán soterrados na súa igrexa. O mesmo sucederá máis adiante, xa na segunda metade do século XIX, co que foi o último dos organeiros da Catedral, Mariano Tafall. Mais, por mor dun recente descubrimento que será revelado durante a propia andaina, iniciaremos a xornada no cemiterio da Confraría do Rosario, ao carón do convento de San Domingos de Bonaval. O percorrido rematará cun pequeno recital a cargo de Alejandra Escolante (espineta), que interpretará pezas que ambientarán musicalmente a época na que se desenvolveu o traballo destes artesáns.
Data e hora: xoves 17 de abril, 11.00 h
Lugar de encontro: entrada do cemiterio da Confraría do Rosario, rúa de Bonaval, 9
Para asistir á ruta é preciso retirar invitación.
Ás 13.00 h concerto na igrexa da Terceira Orde.
