CINEUROPA · ACTIVIDADES PARALELAS
DO GUIÓN Á PANTALLA · ENCONTRO CO DIRECTOR SPIROS JACOVIDES
Spiros Jacovides naceu en Londres e estudou dirección na Escola Helénica de Cinema e Televisión Stavrakos. En 1998 foi estudante convidado na Academia Alemá de Cinema e Televisión de Berlín (DFFB). Escribiu e dirixiu tres curtas. Pedra negra é a súa primeira longametraxe.
Pedra negra é unha historia ficticia sobre a vida real, unha fiestra aberta á traxedia grega moderna. A través da historia dunha familia, amósanos unha sociedade en desintegración, cun sistema familiar forte, no que cada un ten o seu rol, asignado ou asumido persoalmente dunha maneira consciente ou inconsciente. Estes roles perpetúanse xeración tras xeración a un alto prezo para os implicados.
Un fillo decide fuxir. As accións ás veces miopes, a miúdo cómicas, dunha persoa, pódense converter nunha traxedia para moitos. A nai loita por atopalo e manter unida a familia e asume a función dun estado grego cheo de carencias. O intento traxicómico da familia tradicional grega de adaptarse a unha nova realidade, a un mundo que está cambiando. O nó imposible de desfacer da realidade grega, sempre tan complicada e autodestrutiva, que fai que os seus heroes sintan que calquera intento de abordala, resolvela ou escapar dela sempre acabará co mesmo resultado: co nó apertándose. É unha sensación que moitos de nós experimentamos ao medrar neste país.
A forza motriz da nosa historia é Haroula, esta nai que parece perder o seu lugar no mundo moderno. Ten problemas e responsabilidades abondas, pero de non as ter as súas inquedanzas aumentarían, perdería a súa razón de ser, a súa identidade, e todo o que quedaría sería ela soa cos seus desexos, cos seus soños, e daquela tería que se enfrontar ao seu maior medo... ela mesma. É fascinante este tipo de medo como unha forza oposta á vida. A xente que ten medo de vivir, de fallar, de perseguir os seus soños, os seus desexos, de descubrirse a si mesma, e que en troques se aferra a un rol e se agocha detrás del, evitando realmente responsabilizarse da súa vida. Vidas que non se viviron. Pedra negra comeza incerteira e aos poucos vai atopando o seu camiño e todo encaixa no seu sitio. Vaise debuxando a historia, a trama e os personaxes toman forma e a película convértese nunha viaxe poderosa.
Neste encontro, Jacovides explicará como traballa desde a concepción do guión ata a rodaxe do filme, como a primeira versión dunha película é a que ve o director durante a escrita e lectura do guión co resto do equipo e como se chega á versión que ve o público.
Trátase dunha actividade en dúas etapas:
13 de novembro: Proxección de Pedra negra. Sala Mozart, 18.00 h.
14 de novembro: Encontro con Spiros Jacovides. Sala Mozart, 15.30 h.
A sesión desenvolverase en lingua inglesa con tradución simultánea
Inscricións en cineuropa.gal
