Sesión especial
Coa filosofía de recuperar o patrimonio inmaterial da cidade de Santiago e de Galicia, retomamos a colaboración co Cineclube de Compostela para render tributo á figura do dramaturgo, director de escena e actor Roberto Vidal Bolaño, persoeiro fundamental das rúas de Compostela e axente cultural e social imprescindible da cidade na segunda metade do s.XX. Principalmente coñecido polo seu traballo vinculado ás artes escénicas, a súa obra esconde unha cara b vecellada ao cinema e, sobre todo, á televisión. Nun contexto de emerxencia audiovisual, ao albor da nacente TVG e outras iniciativas, o creador compostelán desenvolveu unha serie de proxectos visuais pouco coñecidos polo gran público que agora queremos poñer en valor. A sesión contará coa presenza de Roi Vidal, fillo de Vidal Bolaño.
Roberto Vidal Bolaño
Roberto Vidal Bolaño (Santiago de Compostela 1950-2002) iniciouse no mundo teatral da man do grupo Antroido, no cal representou como actor as súas primeiras obras e convertiu na primeira compañía teatral galega. Tamén foi un dos primeiros directores que participaron do teatro institucional, poñendo en escena (en colaboración co Centro Dramático Galego) en 1984 a súa obra Agasallo de sombras.
Ademais da dramaturxia, escribiu guións para a Televisión de Galicia e para Televisión Española. Traballos como Malos Tratos, Novo de Parmiude ou Morosos Varios son da súa autoría. Levou á pantalla relatos de grandes escritores galegos do século XX, como Ánxel Fole (Cara de Lúa) e Eduardo Branco Amor (O Noxo) e participou como actor en varias series televisivas como Mareas vivas.
No ano 2001, representou co Centro Dramático Gallego Rosalía, que Ramón Otero Pedrayo escribiu en 1958. A súas últimas actuacións foron no grupo "Teatro do aquí", súa compañía dos últimos anos.
A obra de Vidal Bolaño está marcada pola estética da derrota e a crítica da modernidade. Defendeu unha recuperación do teatro popular, cultivou o teatro histórico e ademáis das influencias de Otero Pedrayo tivo como referente o teatro de Valle-Inclán. As súas obras recollen e mesturan as correntes estéticas do realismo, simbolismo, surrealismo e expresionismo.
