CURTOCIRCUÍTO 2020
Longas x Curto
Nesta edición Curtocircuíto programa as primeiras ou segundas longametraxes de cineastas que levan moitos anos medrando ao noso lado. Hai xa dez anos que Curtocircuíto exhibiu por primeira vez un traballo de Lois Patiño, do mesmo xeito que o festival fixo a primeira retrospectiva de Jessica Sarah Rinland hai xa tres edicións, que ademais viña de participar na Sección Oficial un ano antes, onde resultou gañadora. Igualmente, Curtocircuíto exhibiu con moito éxito as primeiras curtametraxes do colombiano Camilo Restrepo, que estará en Santiago por terceira vez. No caso de Oskar Alegria, se ben os seus traballos anteriores non formaron parte das nosas programacións, como director do Festival Punto de Vista mantivo unha estreita colaboración con Curtocircuíto. Todos eles son hoxe cineastas de sobra recoñecidos no circuito internacional.
Those That, at a Distance, Resemble Another
Jessica Sarah Rinland | 2019 | 1:07:00 | Reino Unido, Argentina, España | DOC | COR
Co cairo de marfil dun elefante como protagonista, Those That, at a Distance, Resemble Another propón unha reflexión sobre a infinita sensibilidade da conservación museolóxica e ecolóxica, invitando a reflexionar sobre formas de representación, réplicas e materializacións de diversos materiais, as disciplinas e as institucións.
