Recomendado para alumnos/as de Infantil, 1º e 2º Primaria
BANDA MUNICIPAL DE MÚSICA DE SANTIAGO
David Fiuza Souto, director
Cristina Collazo, actriz
Programa:
- Toni Cantal: O neno de pau -conto musical-
(Música)
SALA MOZART. AUDITORIO DE GALICIA
Idade recomendada: Infantil, 1º e 2º primaria
Duración: 45 min
Lingua: Galego
Nun país habitado por fadas, trasnos e outros encantos todo era felicidade, xogos e risas. Un día, un trasno de nome Rosmón decidiu que xa non aguantaba máis tanta alegría, botou un arroto e berrou un esconxuro. Ao que lle alcanzase o arroto convertíao nunha estatua de pedra, pero unha das fadas foi quen de agocharse nun carballo e salvarse do feitizo. Iso si, tiña que quedar alí e non saír, a non ser que soubese a resposta dunha adiviña.
Paula e o seu avó vivían tranquilos nunha pequena vila. A nena estaba de aniversario, así que foron os dous en busca dun fermoso agasallo a unha carpintería onde facían bonecos. Paula escolleu entre todos eles e elixiu un bonequiño de madeira de carballo, mesmo parecía un neno de pau.
Paula xogaba horas e horas con aquel boneco, pero un día, cando menos o esperaba, o boneco comezou a falarlle. Ela case morre co susto, pero ao final entendeu que quen lle falaba non era o boneco, senón unha fada que vivía dentro del e que non podía saír por culpa do feitizo do trasno. Tras oír a súa historia, Paula decidiu que ía axudar á fada a buscar a solución da adiviña. Necesitarán moito enxeño para superar os obstáculos que atopen no camiño e moita axuda. Serán quen de conseguilo?
